Tamanna

Tamanna kar loon tujhe pane ki Gar Izazat ho teri.
Aaina dhoondh wo laaoon jisme soorat ho teri,

Dil bahakta hai teri saans ke choo jaane se.
Nigahband kar loon tujhe Gar tu ibadat ho meri.

Saans lena bhi teri aas ke bin mushkil hai.
nabz chalna tere ehsaas, ke bin mushkil hai.

yu to jeeta hoon main, kahne ke liye e kafir.
main bhi peena wo teri pyas ke bin mushkil hai.

Aur tum kahte ho ke Zindagi yoon guzar jaayegi ...

Zindagi yoon guzar jaayegi bataya bhi nahin.
tabassum chookar guzar jaayegi jataya bhi nahin.

dekhta aks tera main ye jaanane ke liye.
hai teri aankh mein utra mera saaya ke nahin.

roobaroo hona mere ishq ki guzarish hai,
saath chalna wo tere husn ki navazish hai.

rooh se rooh ka milna bandagi hogi,
Gam-e-dil aaj mein lekar yahan aaya bhi nahin.

sirf teri yaad aa rahi thi!

woh maagh ki ek raat thi,
chandni apne chaand ke saath thi,

kuhra kuch tarah chaa raha tha,
ke kchitij ko main apne aur nazdeek paa raha tha,

chai ke pyale se uthta dhunaa bhi,
us badhti huii sardi ka ehsaas kara raha tha,

kapkapate badhte kadmo ko fir bhi ye ehsaas hai,
ke aane waali manzil liye ek garmi ka ehsaas hai,

baglon mein dabe hue haath yoon machal rahe the,
jaise hum unhe pahli baar choone ko chal rahe the,

aankhon se tapakti wo boondein
hoothon ko mom ki tarah pighla rahi thi,

halki si chalti hawa meri gardan se hokar
meri rooh tak jaa rahi thi,

fir bhi har lamha har pal har uthte kadam ke saath
mujhe sirf teri yaad aa rahi thi,

sirf teri yaad aa rahi thi!

Aahwahan

Ahwahan hai prat ka fir huaa shankhanaad se,
Ab nisha ka yah anth hai ho raha shubhaprabhat se,

Shlok phir kar rahe hain watavaran anandmay,
Sugandhit punah vayu hai yah vismayi is dhoop se,

Hai rakth ranjit marg yah dhul chukka ashru prapat se,
Garjana kar fir uth rahi hai manavata is aaghat se,

Shatru bhayakrant hai dekh haath fir is haath mein,
Vichalit hui Ashanti fir hai gaganbhedi shaanti se,

Vibhatsya tha wah pristh vikaral kaal kapaal sa,
Prachanda dhwani ati ugra vikchipt man aaghat se,

Tha vayumandal surkh sooryasth ke us rang sa,
Tha yah drishyankan us swarg ke mohbhang sa.

Bhj rahi thi ghantiyan asankya par tha ek sur,
Kar rahe jan archana tha prarthana ka ek swar,

Par ek nar kunthit vicharon se pradarshit maarg par,
Kar gaya dooshit swarg ko aashankit ek aadhaar par.

Secrets of a longer life and living happily ever after …

It was yesterday three of us were discussing about life, what is life? why live? and so on .. suddenly a phrase popped up
“Uparwaala achche logon ko jaldi upar bula leta hai” …

and non of us is in a hurry to go “up” … so here begins the real discussion …

What do we do to be considered as a bad person ???

And here bad means real bad ... bad for God so HE won’t consider you the next best soul around and call you up …

We discussed some of our so called bad habit’s drinking and laziness but it turned out that we are not as bad as the people who have a bad thinking process who are always thinking bad for the very next person …

“yaar apan ne kabhi kisi ka bura nahin kiya for that matter sochte bhi nahin hai yaar this means humaare paap ka ghada nahin bharne waala” …

“yaar kuch badhiya soch mere ko lamba jeene ka hai some kind of perfect paap jo bhagwaan bhi na ignore kar paaye ” “I should suffer in this hell for a looooong time”

“chal do chaar murder kar daalte hain”

“oae par ye soch … kisi bure insaan ko maara to duniya ka bhala kar rahe ho … aur agar kisi achche insaan ko maara to tu bhgwaan ke angle ka kaam kar raha hai … arre use God already upar bulana chaahta hai”

“That’s not paap … ”

“Hey lets cut a bargad ka ped … no no a mango tree … it has lots of medical benefits … it’s a shelter for lots of birds and bugs … jyada se jyada logon ka bura hoga ... it’s a perfect sin”

“oae kya aari leke poore din laga rahega ek ped kaatne”

“no we’ll use chainsaw”

“The Great Bangalore Chainsaw Masacre”

“bhai apan famous ho jaayenge … news papers headline, KalTak ki Breaking News … news reporter … we’ll become celebrity" …

"fir apan NGO’s ke saath lag jaayenge Mission ‘Save the Green Planet’ … we’ll go and plant the trees … thousands of them”

“nahin nahin Idea cancel … apan fir se duniya ka bhala karne lage and apna paap ka ghada khaali ka khaali”

“yaar teen engineer baith ke ek perfect paap nahin soch paa rahe ho … think of something big and real sin”

And the conversation went on with some really bad ideas which eventually turned out to be good and our mission to stay on this planet for a long time still nowhere …
Still in search of "A Perfect Sin" ...

Pagalpan

Khuli dhoop mein taaron ki timtimahat ko dhoondhna ek pagalpan hai !
Samandar ki anjaan laharon mein teri ek aahat ko dhoondhana ek pagalpan hai !

Bhatakta kyun hoon darbadar tere saaye ki talaash mein main !
Jaanta hoon main ke bahakti hawaon ko dhoondhana ek pagalpan hai !

Khudkushi kyun karoon jaanta hoon ke jab main zinda hi nahin !
Rooh meri hai wo jaati hui falak ke paar, udta huaa koii parinda wo nahin !

Tum aaoge, muskuraaoge, meri saanson ko choo kar chale jaaoge !
Is khushfahmi mein yoon mera din ba din jiye jaana ek pagalpan hai !

par main kahna chaahta hoon ...

jhilmil jhilmil jaisi aati chapal hansini jaisi tum ho!
jeevan mein ullaas jagati mridul mohini jaisi tum ho!

rang bhar rahi ho jeevan mein tum, sang chal rahi ho rahon mein tum !
moorchit pakchi ko udne ka ehsaas karane jaisi tum ho!

phoolon mein rang bharne waali julf teri hain ghatayein kaali !
oorja ka ehsaas tumhi ho jeevan ki badhti pyaas tumhi ho !

par tere ehsaas aur is pyaas ko yoon badhne dena ek paagalpan hai !
saanse tujhpar arpan karne ka vichar ek paagalpan hai !

Wo kahte hain

Wo kahte hain kavita likhna,
Mere is hriday ka vedan hai.

Wo kahte hain mere shabdon mein,
Teri aakhon ka sanvedan hai.

Yoon smarit hue ho tum is pal,
Man vyakul hai man hai chanchal.

Ab shabdkosh bhi rikt huaa hai,
Abhivyakti ka uttejan hai.

Wo kahte hain kavita likhna
Tum bin ab mera jeevan hai.

Wo kahte hain meri saanse,
Tere jeevan par arpan hain.

Mera yah jeevan dhanya huaa,
Yadi choo paaoon pratibimb tera.

Tumhe paane ki abhilaasha nahin,
Shat janmon tak abhinandan hai.

Main rashmirathi kaa aalingan kar

Main rashmirathi kaa aalingan kar,
Swatah pran taj jaaoonga,

Watvriksh lata ka anubandhan kar,
Utkrishta samapan paaunga,

Nirvighna pratarit hone se,
Sharshaiya kendra mein sone se,

Vichalit is man ke prashno ka,
Uttar naa khoj kar laaoonga,

Yadi prashna tha mere man harshan ka,
Aakarshan ka pratikarshan ka,

Jis marg pe laherein saath bahi ho,
swapn mein usase kataraoonga,

Vichalit jo kiya tha hriday tumhara,
Parichit prashno ka uchcharan kar,

Vish ke pyale ko samajh sudha main,
kanth samahit kar jaaoonga,

Main rashmirathi kaa aalingan kar,
Swatah pran taj jaaoonga.

Yadi main hota ek neelkanth

Yadi main hota ek neelkanth,
tum saavan hote mere,

yadi main hota ek vaadya yantra,
sangeet aur sur tere,

yah faagun ritu ati madhurim hai,
kshan romaanchit kshan harshit hai,

yadi main hota ek shwet pankh,
Tum pavan ke naajuk jhonke,

Taaron ki chavi ati dhoomil hai,
Par ek tara ati chanchal hai,

wah saaykaal kaa ek pal hai,
jab mand baya ati sheetal hai,

yadi main hota wah saaykaal,
to chandraprabha tum mere.

Aakroshit ho naa karo man ko

Aakroshit ho naa karo man ko,
yah mahashorya ka vesh nahin,

kunthit man ki abhivyakti hai,
yah paramveer ka rosh nahin,

Udwalit man yadi raktpaat se,
Maanavata koi shesh nahin,

tum karo sristi ka srijan naya,
Isase paavan uddeshya nahin,

Man krodhit hai Aatankit hai,
Us kshay ka bhi hai rosh abhi,

priyabandhu ne aahuti di hai,
Jisme unka uddeshya nahin,

yah mahatrasadi anth nahin,
yah samay ka ek nivedan hai,

smarit prishth yah karke tum,
badh jaao apni raah nayi.